Als ir vor gehort habt articulo^c decimo^c 1, wy das Meideborgk vzgesaczt ist, vnde wy ir recht bestetiget ist mit des landes willekore. Nu wil er hie mit nichte mehr bewisen, wenne die von Meydeborg sich halden nach Romisschem rechte, vnde nach der Romisschen gewonheit.

Nota. Von alder Meydeborgisschir wise yn der ersten quatertempern in der fasten, vnde yn der ersten fastwochen so /B 141^r ghen sy zcusampne, alle hantwerg, iczlichz uff syn gildehusz, vnde vorrechen^e ynungis buszen, vnde irwerben en zcwene ynunges meistere, die dem ganczin hantwercke nucze sien vnde der stat. Zcu den czwen kysen sy noch zcwene; der sien vire; vnde beschriben dy; vnde geben die beschreben deme rate, die sy zcu meistern vzirwelt haben. Die viervndeczwenczig, die zcu dem iare besessin haben, lasen die ersten hantwerg vzghen, vnde besprechen sich, vnde haben denne zcu rate die wiczigisten der stat. So kysen sy dy wile vnder den viren, welcher der stat vnde deme hantwercke aller nuczt vnde aller erlichst sy.

Nota. Wenne denne dy ratmanne zcu der lobe ghein, das ist zcu deme rathuse, so ghen alle hantwerg zcu sampne yn ire morginsprache; so kysen denne dy rathern alle, iczlich hantwerg sunderlich, die iren; dy mussen sy antwerten by irem eyde, das sy ir nicht vorbess(er)n konnen zcu dem ammechte, das en got so helffe vnde alle heiligen.

Die do kysen sollen, sollen iren eyd dorane bewaren, das sy nicht kisen nach gunst, ader durch gabe, vorchte, ader czorne. Nach gunst, alz ab er ir magk were, ader ir sunderliche frunt; irkente der stat rat das, sy vorloren ire kore, ut extra de eleccione c. per inquisicionem³.

Vnde disse, die do kisen, kisen sy eynen durch gabe willen, die werden meyneidig vor gote. Also ab eyner spreiche: "Kyset mich, ich wil uch czhen phund geben"; do ist eyner alzo vaste eyn symoniacus, alz ab er vmme eyne geistliche gabe gelt gebe, ut i q. i <c.> jmparator⁴. Vnde wurden sy obirwunden, sy wurden mit enandir erlosz, vnde musten der stat gnaden suchen, ader der stat x iar entperen, vnde sien ewiglich erlosz.

Kisen sy denne eynen durch vorchte wille, als: "Kusist du den nicht, ader syne frunt, die mogen dir ewiglichen schaden, /B 141^v vnde alle den dynen", solliche kore sollen die andern sine eytgenossen sehen. Sehn sie, das er is darumme tut, er hat sine kore vorloren, ut extra de eleccione c. quisquis⁵.

Kisen sy ouch durch nydis willen, alz: "Kysen wir <den^f>, der mag sien nicht gewarten, vnde vortirbit darane", adir: "Kise<n> wir den, der mag sich lichte vorwarlosen vnde yn schaden komen douon", solliche kore towg ouch nicht, durch des zcukunfftigen schadens wille, den sy hoffen von deme, den sy kisen.

Lihit die kore abir an gewaldiger hant, der sal sine ere, syne zele vnde sine truwe ansehen. Er sal nicht kisen nach gunst, noch durch bete, noch durch gabe, noch durch nydes, noch durch keinerhande vorsacz wille. Sunder er sal kisen nach truwen vnde nach eren, vnde nach rechter warheit.

Er sal nicht kisen nach richthum; wenne keusit man eynen, der zcu rich ist, ader zcu gewaldig, der wil mit gewalt varen, vnde die arme gemeine mit gewalt vordrucken, vnde arme lute vorsmechen, vnde stet nicht nach der gemeinen nucz; sunder er steit mehir nach sines selbist nucz, vnde ryket^g sines gutis.

Er sal ouch keinen armen kisen; wenne die konnen keine vornu(n)fft, wenne den ist notir, das sy dinen, wen(ne) das man en dynet. Lute abir, die do gemeine lute sien am gute, sal man kisen, wenne worumme den genuget an dem iren, vnde begeren keines fromdes gutis. Wenne worumme man vindet selden eyne stat, do sy drierley volg; alzo pouel, das die gemeine heist; armuth, dy do dynen; richen, dy do hirschen. Die richen vnde dy armen volgen selden irer vornu(n)ft. Die richen thun mit gewalt vnrecht, die armen durch notd. Der pouil ader dy gemeine, die nicht zcu riche noch zcu arm sien, dy habin das mittil; das ist das aller edilste. Dornach sal /B 142^r sich der kore herre halden.

Ouch wen man kisen sal, der sal ouch keinen naturlichin gebrechen habin, alzo masilsuchtig, toup, stuhm, blint, cropil, ader vnsynnig, ader eyn lunaticus; wenne disse sachen eynen iczlichen an der kore, beide <an^h> werltlichin vnde <anⁱ> geistlichin rechten, hindern. Wurden sy abir dornach gebrechlich, so mag man ir dornach nicht abesetczen. Man sal ouch keinen kisen, der yn dem banne ist, noch yn des richz achte ist; vnde ab er eyn ketzir were, ut in autt. de privilegiis dotis mulieribus hereticis non prestandis § i colla. viii⁶.

Vnde man sal ouch den nicht kisen, der vnelich ist. Wen den man kisen sal, der sal elich syn, er sal besessin sien, ader sal eyn elich man sien. Er sal zcu sinen tagen komen sien, das ist zcu xxv iaren, <ut> ss li. i ar. xlii ehr sinen tagen⁷. Ouch sal man keinen fromden, der vz eyme and(er)n gerichte ist, yn <den^j> rat kysen. Man sal den nicht kisen, der selden ynheimisch ist. Vnde den sal man ouch nicht kisen, der obir xc iar ist. Alzo ist is ouch vmme alle sachen, die mit kore zcukomen.

Nota. Wenne denne die hern zcu der lobe komen, vnde herren kisen nach irer czal, so treten <dy^k> nuwen uff vnde die alden <neder^l>. So sweren sy alle mit eynem eyde ghein der sonnen mit vffgeracten vingern, eyn iczlichir synen namen zcu bekennen: "Jch, A., swere gote, vnserm hern, deme koninge, vnde deme rechte, vnde der ganczin gemeinen, arm vnde riche, gewere, getruwe, vnde nucze zcu sien, mit rate vnde mit hulffe, vnde mit aller craft vnde macht, als ich beste kan vnde mag, stetiglich vnde vnuordroszin recht zcu stercken vnde vnrecht zcu krencken, vnde der gemeinen nucz bystehn, vnde helffen, wo ich kan ader mag, vnde der stat heymelichekeit nymer zcu melden, widir mit worten /B 142^v noch mit wercken; vnde swere, gerechten gehorsam vnser stat meistern stetiglich zcu halden, zcu der stat nucze vnde ere; vnde des nymer zcu lassene, widir durch libe, noch durch leid, nyd, hasz, noch durch gabe; das mir got so helffe vnde alle die heiligen."

Dennoch ist der eyd uil swerer, denne disser ist; denne der andere ist eyn <eydt^m> des ammechtis. So kisen die xxiiii czwene burgermeistere. Die sweren eynen sunderlichin eyd, alzo vorⁿ gesprochin⁸. So sprechen dy alden^o rathern vnde dy burgeremeistere zcu den: "Wir gelaben eyne gute vnde redeliche rechenunge zcu thune, vnde dancken uch gemeniglichen; vnde bitten vor dy armen^p gemeine, daz ir die mit truwen meynt; vnde bitten vor uwere arme dynere, das ir die gutlichin abewisit." So lutet man zcu dem burgirdinge dristunt. Dornach ghen die hern alle mit eynandir, beide alde <vnd^q> nuwe, die nuwen vor, die alden nach, vnde setczin sich uff dy bencke. Alzo sy sich geseczen, zo heist der vronebote das volg swigin. So stehn die alden zcwene burgermeistere uff, vnde dancken der gemeinen mit sollichen worten: "Libin frunde, hie stehn vnsere hern vnde dancken uwern eren vnde euwerer stetiglichir vndirtenigkeit; vnde beuelen ouch uch dissin herren, vnde bitten uch, das ir sy in eren vnde in wirdigkeit haldt, alz man sy zcu rechte halden sal. Hette<n> wir uch vnde der gemeine nucz wol gedinet, das were vns lip, vnde dancken uch sere." So setczin sy sich wider nedir. Vnde zo lasen die nuwen herren ir burgirding kundigen, vnde heiszin sich dy gemeine bedencken, ab sy by der willekore blibin wollen, do sy ynne gewest sien. So ist das burgirding geant, vnde <erlouben^r yderman czu gehen^r> an sien geschefte.

Jr sollit wissen: Eyne willekor trit <entczwei^s> mit eyner gewonheit. Eyne wilkore ist der gewonheit orsprungk, /B 143^r wenne von der wilkore <ist^t komen^t> die gewonheit. Vnde eyne willekor mag sien vnde sal werden ader geschen an sollichen dingen, douon kein recht geschreben ist, ut xi di. <c.> in rebus⁹, <et> Institut. de iure naturali gencium et civili § ex non scripto¹⁰.

Jr sollet wissin: <Wanne^u> gewonheit adir wilkor geschen sal, die sal erlich sien, ut Institu. de iusticia et iure § iuris precepta¹¹. Ouch sal die rechtuertig sien, ut xxxv q. v <c.> porro¹², <et> i di. c. ius naturale¹³. Die sache der gewonheit sal ouch mogelich sien, ut xv q. i c. non est¹⁴. Die sache der gewonheit sal och naturlich sien, ut iiii di. c. erit autem lex¹⁵. Ouch so sal die wilkor nucze sien der stat vnde der czit, ut lxiii di. c. cum longe¹⁶. Ouch sal die offinberlich geschen, nymande sunderlichen zcu schaden, ut iiii di. <c.> erit autem lex¹⁷. Ouch sal die willekor nothaftig sien zcu der gemeinen nucze, ut xxix di. c. regule¹⁸. Ouch sal die wilkor nymande sunderlichen vromen, sunder sie sal der gemeynen nucz sien, ut iiii di. <c.> mala consuetudo¹⁹. Wo abir eyne gewilkorte gewonheit der vorgnanten stucken nicht en hat, do sal man die vorwerffen.

Jr sollit wissin: Wo²⁰ eyne gewilkorte gewonheit beschreben rechtis craft habin sal, die sal alzo alt sien, daz ir anheben vnde beghin nymand gedenckit, <ut> ff. de aqua pluviali arcenda l. <i^v> § que sit²¹. Wurde abir eyne willekor getan yn eyner stat, vnde swiget man darczu iar vnde tag, vnde wedirspricht man des nicht, alzo recht ist, die wilkor hat craft, ab man czwir nach ir gericht hat, <ut> C. de episcopis l. iii in fi.²² Were is sache, das wider dy willekor gesprochen were zcwir, vnde die widersprache vorleget wurde, das sy recht vnde redelich were, ader das sy von gewaldiger hant gegebin vnde bestetiget were, do hette dy wilkore craft, <ut> ff. ad legem senatus consultu l. cum de consuetudine²³. /

B 143^vWen gebe eyn furste eyne gnade eynir stat, die gnade w(er)t eyne willekor, vnde dy willekore w(er)t eyn recht. Wenne des fursten redelichir wille w(er)t eyn recht, ut Institu. de iure naturali gencium et civili § sed et quod principi²⁴. Wenne die wilkor sal sien alzo eyn recht, ut Institu. de iure naturali gencium et civili § ex non scripto²⁵. Wenne wo solliche gnade ader wilkor landen vnde steten gegebin w(er)t, dy sal man kundigen zcu dem burdinge offinberlichen; wilkort dy gemeine dorczu, so sal man darnach richten czwir ader^w driestundt, ab man wil, das wilkor hat craft, vnde zcu allen voitdingen. Alz den(ne) dy iarczal vzkommet, vnde man nuwe hern keusit, vnde die ufftreten zcu dem burgirdinge, so spricht der burgermeister, ab sy wollen by der selbien willekor bliben, do sy daz iar ynne gelegen sien. Zo steit is an der gemeine, ab sie des volborten wollen ader nicht. Sy habin ire gespreiche in irer morginsprache, vnde habin morginsprache vmme alle die stucke, die von der stat willekore wegin vorboten syn. Wenne worumme sy torren vnder en selber keine wilkor thun, ir hantwerg domete zcu bess(er)n, ane der stat rath volbort vnde des lantherren ader der stathern bestetigunge, ab dy sache alzo bewant were, das ist, ab des^x hantwerckis bestet<ig>unge not ist. Jst aber des nich<t>, so dorffin sy des landes herren noch der stathern bestetigunge nicht. Das ist zcu uornemen: Ab eyn hantwerg were, is were welchirley is were, vnde hetten ire briue vorloren, vnde weren die briue von der stat gegeben deme hantwercke obir yre vryheit, dem hantwercke mag der stat rat wol eynen and(er)n briff gebin obir yre fryheit. Jst abir dy gnade mit des hern brieue bestetiget, der stat rat mag sy nicht bestetigen; der herre mag is abir wol thun, ab er wil, <ut> C. de negociis /B 144^r gerendis^y <l.^z> i²⁶.

Jr sollit wissin: Dis sollen die czwene meistere vor den burgirmeistir /B 144^v brengen in der stat rat. Vnde sal der burg(er)meist(er) zcu hauͤt vnde zcu hare richten. Dis ist zcu uornemen vmme allerhande spisekouff. Vnde ist ouch zcu uorneme<n>, das man den vor die schepphen furit, ader uff den prenger seczt, ader deme gliche. Man slet abir keinen zcu der stupen, wenne vmme dube vnde vmme roub, ader dem gliche. Dis ist ouch zcu uornemen vmme allirhande hantwerg, die vzgesaczt sien. Wer do weder tut, der ist vz der ynunge geworffen. Vnde dis ist ouch zcu uornemen vmme vnsere garbretere, vnde hacken, vnde fischkouffir, vnde heringmengere, vnde solliche lute, die marckthacken heist.

Nota. Vnsere cramere abir sien gescheiden alzo: Sydencromere vnde lynencromere, lynwantsnydere, beuteler, czomestrickere, tesschener vnde seteler, die gehoren alle zcu eynem geldehusze. Vnde sy sollen by der vorgnanten buszin der stat kore halden, vnde sollich recht, das sy meistere kisen; vnde alles, das yn irer morginsprache geschit, das ist ir meister nach irer rechten vzgesaczten kore zcu richten, ab is nicht gilt lip ader gud, ader hauͤt adir har antrift. Setczit er sich wider dis, die meistere sollen das der stat rate kundigen; der sal sy pynigen nach irem vordynten rechte; vnde das hantwerg sy em nedir geleit; der mag^d' er nicht wider ankomen, wenne mit der stat rate willen. Weigirt sich des das hantwerg, vnde hat er widir das hantwerg mer getan, vnde bekennen die meistere by irem eyde, er ist ewiglichen von synem hantwercke geworffen. Jst er^e' abir ny^f' deme hantwercke voruallen, vnde bittit en der stat rat wider yn, er mag sien hantwerg widir triben; rechteloz ist er abir ymmer. Das ist, das er nymandis geczug mag sien; er mag ouch nymandis gerugen yn dem hantwercke; er sal ouch yn die morginsprache nymmir /B 145^r komen zcu den meistern. Amechtis ist er vnwirdig, mag man en lichtiglichen berouben sines hantwerckis, ut C. ex quibus causis alicui infamia irrogatur l. condempnatos²⁷, <et> Institu. de capitis diminucione § minima²⁸.

Jr sollet wissin: Wo cromere ader andere hantwerg, die yn eyner stat sien, dy mit der stat schossin, wachen, czinsen, vnde beynniget sien, mogen and(er)n cremern vnde hantwercken, dy do gastwise^g' komen, ire narunge nicht weren noch vorbieten; js were denne, das^h' dy, dy in der stat besessin sien, begenot weren mit der fursten brieue vnde der herren, do sy sunderliche friheit mete bewisen mogin, do sy is mete geweren mochten.