[44 § 1] Jr hochster richter zcu Meideborg, der hat drie voitding in dem iare: Eyns an sente Agethen tage¹, daz andere an sente Iohannes tage des ewangelisten², daz dritte am achten tage sente Mertenis³. Komen disze dingtage in viertagen ader yn gebunden tagen, so vorlust er sien ding. Vnde komit er ouch zcu dem dinge nicht, zo w(er)t em och des dingis nicht. Ader komit der schultis dorczu nicht, zo w(er)t is em abir nicht, wen(ne) der schultis sal dem burcgreuen daz erste orteil vynden; vnde komit der schultis zcu dem dinge nicht, er wettit dem burcgreuen czen phunt, js beneme denne em echte nodt, die er bewisen sal, alzo recht ist.

[44 § 2] Waz zo vngerichtis /B 145^v geschit virczin nacht vor dem burdinge, daz richtit der burcgraue, vnde anders nymant. Not vnde lage vnde heimsuchonge, daz richtit ouch nymant, denne der burcgraue.

[44 § 3] Jst aber, daz der burcgraue do nicht gesien mag, vnde geschit not ader eyn vngerichte, do dy hanthaftige tat keinwertig ist, die burgere kysen eynen richter an des burcgrauen stat.

[44 § 4] Wenne der burcgraue ufsteht von den dingbencken, vnde getedinget hat, zo ist sien teding vz; zo leget er zcu hant des schultis ding vz von deme nehisten tage obir virczin nacht^b.