Noch dem alz ir gehort habt, wy eigintschaft vffkomen sy von gesacztem rechte, vnde waz des beschrebin rechtis sache sy.

Nympt eyn vry man eyn eigen wib et cetera. Jr sollit wiszin, daz waz eczwan, daz man die mutere an sach, dornach rechte man die gebort, ut Instituta de ingenuis § ingenuus³. Vnde darumme ist eyne gemeine regele: Ap eyn eigin wip entphinge eyne frucht, vnde wurde in der frist vry gelaszin, /B 13^v dy wile dy frucht noch by ir were, vnde daz wip wurde wider eigen, were dy frucht nach^e der gebort fry ader eigen? Disz vorantw(er)t daz recht, vnde spricht, die frucht were vry; wenne die muter mochte sich wed(ir) eigin gebin, vnde nicht die gebort, ut Institu. de ingenuis § quesitum est⁴, <et> in aut. de constitu., que ab sequenti ex libera natos^f liberos esse vult^g § i colla. v⁵.

Jr sollit wissin abir, daz wir Sachzen aber slan nach der vryen gebort, wen daz recht saget, daz alle Wende vry sien. Vnde daz recht brochte uff bischoff Wigman von Meideborgk.

Jr sollit wiszin, alz wir vor gesprochen habin von eigen. So^h ist eyn vndirscheit czwisschen eigin vnde dinstluten. Wen eczliche sprechen, daz dinstlute eigin sien, ut in ss li. iii ar. xli got hot den menschen⁶. Vnde do spricht er Eicke, daz von angenge, do man recht saczte, do were kein dinstman gewest, sunder do weren alle luthe vry gewest, alzo ouch hir vnser recht vzwist, supra ar. i § lantrecht⁷. Weren denne do keine dinstlute gewest, <soⁱ weren auch alle ding fry gewest,ⁱ> vnde daz were <widder^j> keiserrecht, ut Instituta de iure personarum § summa itaque⁸. Vnde wer denne eyn erbdinstman ist, der ist nicht vry, vnde darumme ist er eigen, ut C. de agricolis et censitis l. non diucius⁹, <et> ff. de legatis l. si quis inquilinus¹⁰. Ist er denne eigen, so ist daz valsch; vnde der diffinicio ist nicht genug domete getan. Wenne alle luthe sien enczwer vry ader eigen.

Solucio¹¹. Jr sollit wissin: Etczlich dinst lyt vff mannen; eczlich vff gute. Der dinst, der vff mannen liet, der macht eynen eigen, vnde heist servus; vnde der dinst, der vff deme gute liet, macht eynen nicht eigen, sundir muz douon dinen deme, des daz gut eigin ist, darumme daz er daz gut haldin wil, ut C. de censitis <l.> ne diucius¹².

Jr¹³ sollet wiszin dis(ser) sachen eyne vndirscheit. Wovon der eigene dinet, das /B 14^r ist substanciale. Wen er ist eyne vndirscheidunge des dinstes, vnde dinet vmbe sien lebin, ut Instituta de iure personarum § servi autem¹⁴. Des dinstmannes dinst ist <accidentale^k>. Wenne er dinet vmme daz, daz em accidentaliter zcugeleget w(er)t vmme sien dinst.

Daz¹⁵ eyn dinstman nicht eigin ist, daz moget ir mercken do by, wenne der dinstman dinet vmme eczwas, daz ist vmme daz guth; der eigin abir vmme daz, daz er lebin moge.

Eyn¹⁶ dinstman mag ritter werden, vnde der eigene nicht, ut C. de negocijs gerendis l. nemini¹⁷.

Der¹⁸ dinstman darff nicht orloube^l von sinem hern habin, ab er prister wil werden, der eigin mus aber orloub habin, <ut> C. de episcopis et clericis l. ingenuus § servus¹⁹, <et> extra de servis non ordinandis c. instruendi²⁰.

Ouch²¹ mogin dinstlute ir gut laszin vnde lien, daz mogin die eigen nicht thun, ut Instituta per quas personas nobis acquiritur § item nobis acquiritur²².

Nota. Eigin sien worden drierley wyse: Enczwer eigen sien worden von gesacztem rechte, ader sien eigen wurden geborn, ader die von eigen wib(er)n sien geboren.

Dy eigen, dy von gesacztem rechte eigen wurdin sien, daz ist von gefenckenisz, alzo vor gesprochen ist, ader er ist vry gewest, vnde hat sich selbir eigin gemacht, enczwer mit vorkouffene ader mit^m vorgebine.

Jr sollit wissin vorbasz mehr. Weldeⁿ sich eyn vry man eigen geben, darczu ist nod vir sundirliche stucken; daz selbie ist ouch not zcu eynem kouffe. Czum ersten mole sal der kouff tougen. So sal, der sich vorkoufte, xx iar alt sien, ut ff. de statu hominum l. iiii²³, <et> C. de <libertate^o> l. ministerium²⁴. Czum andern mole, daz er des geldis genoszin habe, <ut> C. de liberali causa l. non adeo²⁵. Czum dritten male, daz is mit der erbe wille gesche, <infra^p> e. c. ult.²⁶, <et> C. de quibus ad libertatem declamare non licet /B 14^v l. i²⁷. Ouch sal man alzo vorkouffen, daz man des vorkouften erreheit^q nicht en wisse, ut ff. de <liberali^r causa^r> l. liber § si quis sciens²⁸. Ouch sal der kouff vor gerichte bestetiget werden. Vorgibt sich aber eyn frier eynem eigen, vnde zcu sotaner gabe gehorit allis daz, daz zcu eynem kouffe gehorit; man mochte is anders weder reden, vnde mit rechte an sine vriheit brengen; wen daz mus geschen mit der erbin wille; vnde darumme spricht der text: Man vint ouch in dem alden rechte geschrebin, das sich selber vor gerichte nymant zcu eigen gebin mag jn wichbilde, is <widder^s wende^s> wol sien erbe et cetera²⁹. Vnde do mete zo rurt^t er zcwu sachen. Czum ersten: Sal der kouff ader dy gabe crafft habin, so sal die gabe mit der erbe wille vor gerichte bestetiget werden. Vnde darumme mochte weder Noe noch Ysaac keinen zcu eigen geben, sint sich eyner selbir ane erbin orloub vnde an geheget ding zcu eigen nicht gebin mag. Jr sollit wissen, daz man eynen sotanen nicht vry laszin moge, man gebe denne daz gelt, daz er ghenen koste, vnde mit ghenes wille, der en <gekoufft^u> hatte; vnde sal en ledig vnde losz lassen an der stat, do er sich zcu eigen gegebin hat, ut ff. de statu hominum l. homo liber³⁰.

Nota. Eyn eigen irkriget sine vryheit wider mit rechte, ab er sines hern tot werte, ader valsche monczere melte, ader hurenczog offinbarte, ut C. quibus causis servi premium accipiunt libertatis l. i³¹, et xxiii³². Vnde daz irwerben sy mit rechte kegen and(er)n luten, daz sy ir herre vrie vnde ledig laszin mus.

Jr soll(et) wissen: Er ist sinem herren phlichtig, ewiglichen zcu dinen, die wile er en nicht ledig lest; vnde mus by nodt dinen vmme sien lebin; vnde waz dem eigen geschit, daz mus man dem hern bess(er)n, vnde nicht dem eigen; vnde der herre /B 15^r mag en vorterbin vor gerichte, ut ss li. ii ar. xix der vater vnde der herre mag wol³³.

Vnde darumme ist daz recht gesaczt, daz czwischen eigen vnde vrie keine ee gesien moge. Wen neme eyn eigin wib eynen vrien man vnwissende, ader eyn vrie einen eigen, vnde mag sich der eigen von sinem hern nicht frien, man mag sy scheiden, vnde eyn igliches nymmit wol eynen and(er)n gegaten, ab is wil, ut xxix q. i <c.> si quis³⁶. Vnde <czoge^v> eyn eigen in eynen orden wider sines hern wille, man muste en sinem hern wider geben, ut liiii di. <c.> generaliter³⁷.

Hie by moget ir wol mercken, daz daz gesaczte recht vnde die saczunge ist komen obir daz naturliche recht, alz ir vornomen habt.