[114 (113) § 1] Darumme ist not, das er hir von der gewere spricht. Vnde disz ist zcu uornemen, ab solliche sache vorbussit wurde, vnde die busze wurde von eynem entphangen, den sy nicht angehorte, wy man denne deme thun solle. Vnde spricht: Welch man <vor^e gerichte^e> et cetera. Komit dornach eyn ander. Dis ist zcu uornemen, der ouch dy selbie sache vord(er)t. Were er abir ynlendisch gewest, vnde hette das nicht vorlutbart yn iare vnde yn tage, sint hette er keine vorderunge mehir, vnde zo were is em dornach vnschedelich; sunder der dy gewere getan hat, muste doch douor antwerten. Were dy clage nur beghunst, alzo recht ist, so mus ghenner, der dy gewere entphangen hat, sine vorderunge laszin mit der werebusze. Daz ist sine vordir hant, ab is vmme totslag, ader vmme lemde, ader vmme wunden, ader vmme halb wergelt were; vnde hochir mag man en ouch nicht triben, we(ne) alz daz recht spricht Institu. de officio iudicis § i⁴; vnde w(er)t domete loz, vnde nicht rechteloz; vnde das halbe wergelt mus er deme geben, deme er dy gewere gelabete, vnde das wergelt dorczu, das er uffgehabin hatte; vnde des todin vorderer mus sich mit deme /B 196^v wergelde abe lassin wiesen, vnde mag en nicht hochir getriben. Wenne⁵ wo die selbie sache ist, do ist ouch das selbie recht, ut Institu. quibus modis ius patrie potestatis solvitur § patri⁶, <et> ff. de verborum obligacionibus l. accio in fine⁷.

[114 (113) § 2] Nota. Gelabit aber eyner. Als vor gesprochen ist von sollicher sache, do eyner eyne gewere vmme gelaben mus vmme pynliche sache, vnde er voruallen sy dorumme, ab em an der gewere broch wurde. Nu so spricht er hie von burglicher sache, das ist, ab eyner eyne gewere gelabe, do dy clage wider lip noch geled antrifft. Die vorlust er, vnde wettet, vnde gibit das weder, das er vffgehaben hat; vnde darumme daz dy sache lichtiglichir ist, vnde darumme vorbust man sy ouch lichtiglichir. Vnde⁸ wo grosser missetat ist, do ist ouch grosser pyn, <ut> Institu. de publicis iudicijs § item lex⁹, <et> C. ad legem Iuliam de vi publica l. i¹⁰.