[57 § 1] Dis ist zcu uornemen von den frouwen, den erbe zcu nemen nicht vorboten ist, vnde der frauwen keine morgingabe vorschrebin ist. Vnde dis ist zcu uornemen zcum ersten male, alzo ab eynem wybe angestorben were eckere ader erbe, ader anders icht, das nicht varnde gut were, das gut stirbit an ire erben, ab sy ane kindere stirbit; sunder gerade erbit sy uff ire nehiste nyfftile. Das selbie ist ouch zcu uornemen von dem manne, der erbit ouch sien gut: Syn hergewete uff sinen nehisten ebenbortigen swertmagen, vnde sien eigen vnde sien erbe uff sinen nehisten magen, <ut> ss li. i ar. xxvii iczlich wip¹.

[57 § 2] Nota. Darczu alles golt vnde silbir, das vngeworcht ist. Were is abir der frouwen gesmyde, vnde were an ir gewant genat, vnde ouch sunderlich, das zcu frouwen geczirde gehorit, das gehort nicht zcu dem erbe. Vnde gortele, vnde beslagene messire mit silber, das dy frauwe getragen hat, vnde vorspan, cronen vnde vingerlin, das ir ir man zcu malschacz gegeben hatte, das /B 162^r blibit by dem wibe. Koppe, schalen, bechere, ader ander tringkefesse ader essingefesse, is sy <silberen^e> ader guldin, kuppherin, eeren, ader welchirley spise is sy, das gehoret alles zcu dem erbe. Eyns ader czwey zcum mynsten sal man der frouwen geben. Dis gehorit alles zcu des mannes erbe.