Das Sächsische Weichbildrecht mit Glosse
‹‹Artikel 55››
Articulus LV
<Summarium> Von gabe, die man vor gerichte gibita.
<Textus>
[55] Uon gaben, die man <mannenb> ader wiben gibit jn gehegetem dinge vor dem richtere vnde vor den schepphen, do mag dy vrauwe mit irem teile, daz sy entphangen hat, thun, waz sy wil, ane rechte widersprache. Das selbie mag ouch der man thun mit synem teile, das <erc> entphangen hatd.
Glosae
[55] Nv bewisit er hie der vorgebunge bestetigunge, als vor gerurt ist in dem nehisten articulo, vnde spricht hie: Waz man eynem manne gibit ader eynem wibe, das ist, was ir das recht gibit, vnde mit orteiln zcugesprochen w(er)t, das an varnder habe ist. Alzo sy is in ire gewere brenget, so ist is ir, zcu thun vnde /B 157r zcu lassen. Das ist zcu uornemen, ab sy is mit rechte irstanden hat, adir ab is uff sy geerbit were, zo bedarff sie keiner besiczunge, <ut> ss li. iii ar. lxxv wer dem and(er)n1 ver. waz man2. Wirt is en abir gegeben von frier gabe an gerichte, der mus is besiczenf drie tage, darumme, ab das gestolen were; vnde sy is so drie tage in irer gewere gehabt hette, wip ader man, vnvorholeng vnde vnvorstolenh, so mochte man sy keiner hanthaftigen tad geczien, <ut> ss li. ii ar. xxxiiii wer syne dube3.
Nota4, also vor gesprochen ist; jr sollet wissin: Gebe mir eyner eyn phert, vnde las ich das offinberlichin riten zcu dem wasser vnde zcu der weide, man mag mich keiner dube darane geczien. Wenne zo habe ichz vnuorholen gehalden, vnde ich halde is vor eyn vnuorstolen phert. Das selbie ist ouch zcu uornemen by eyner kuhe; habe ich die offinberlichin in mynem stalle mit anderem mynem vihe, vnde mag das bewisen, daz ich sy offinberlichin entphangen habe, man mag mich keinerley dube darane geczien. Alzo ist is ouch zcu uornemen vmme gelt; entpha ich das offinberlich, vnde schutte is in mynen kasten, ich habe is vnuorholen vnde vnuorstolen alzo vaste, alzo daz phert in dem stalle, adir dy kuhe uff der weide.
Gebe mir abir eyner vordubete habe in sollichir meynunge, das em libir were, das ich domete begriffin wurde, den(ne) er, bewiste ichz, das ichz vnuorholen vnde vnuorstolen gehalden habe, ab ich vor vnbesprochin byn, <ichi> blibe is billich ane pyn, ab ich mynen geweren nicht gestellen mag. Czoge ich mich an mynen geweren, vnde wurde er mir abetronnig, ich mus das guth mit busze vnde mit gewette lassen, ut Institu. de obligacionibus que ex delicto nascuntur § oblatum furtumj 5. /
a rubriziertes et cetera folgt B.b so L fol. 89ra; fehlt B.c so L fol. 89rb; fehlt B.d et cetera folgt B.e rubriziertes et cetera folgt B.f -cz- doppelt B.g vn- über der Zeile B.h vn- am Rand nachgetragen B.i so L fol. 89va; is B.j et cetera folgt B.
1Richtig: Ssp.-Landrecht III 82 § 2.
2Richtig: Ssp.-Landrecht III 83 § 1.
3Richtig: Ssp.-Landrecht II 36 § 1.
4Zu den folgenden zwei Absätzen vgl. Glosse zu Ssp.-Landrecht III 5 (III 5 § 1) (BG S. 946 Z. 15 – S. 947 Z. 8).
5Inst. 4, 1, 4 zweiter Satz.