Nv habit ir gehort von den vorstendern vnmundiger^f kindere.

Nota. Die¹ hanthaftige tat ist solliche geschichte, das als iczunt geschen were, vnde zcu hant geclaget w(er)t. Solliche sache sal man ouch zcu hant richten, daz ist, man sal den misseteter zcu hant obirwinden, <ut> ss li. i ar. lxvi wen man mit hanthaftiger tat². Dorumme sal man en nicht zcu borgin geben, noch zcu borgen bieten, <ut> C. de custodia reorum l. in quacumque³.

Do spricht das recht: Jn welchir sachen /B 109^r der hanthaftige misseteter begriffen w(er)t, do sal zcu hant eyn cleger sien, is treiffe denne zcu des richters sorgfeldigkeit, das ist, der richter sal irkennen, ab er vnbeclaget dorffe richten. Daz komit von den Romern uff; wenne die hatten richtere, die do phlegelichin musten richten, vnde waren pretores genant; vnde den antwerte man die missetetere. Die musten irkennen, ab der misseteter pyn werdig^g waz, ader nicht. Hatte er nicht hanthaftiger tat, so volget er der wise Torquinii Superbi; des wise waz alzo, die wile er rengnirte: Wenne man em eynen misseteter antwerte, den czoch er uff, vnde marterte en, vmme daz das er melden solde, ab er icht gesellen hette. Der Torquin<i>us irdachte aller erst galgen vnde allerley martere. Vnde darumme spreche<n> wir, is treffe zcu des richters sorgfeldigkeit, wenne is sien vil sachen, die deme richtere beuolen sien zcu richtene, ab wol kein clegir were, ab ouch wol keine bewisunge were. Were abir do bewisunge, alzo hanthaftige tat, so sal er den gefangen brengen vor gerichte mit der bewisunge, do mete er en obirwinden wil, ut ff. de furtis l. furtum manifestum⁴, et l. si igitur⁵, <et> ss li. i ar. lxvi wen man mit hanthaftigir tat⁶.

Mit dissem articulo wil er vns vndirwisen, wie sich eyn iczlichir cleger halden sal, vnde spricht: Er sal en brengen vor den stul, do man zcu richtene phleget; vnde meint domete, das kein man sien selbist richter sien sal. Wenne vunde eyner des sinen icht, daz em genomen were, er sal is nicht wedernemen, sunder mag er en uffhalden, so sal er en brengen vor gerichte vnde mit hanthaftigir tat, alz er en obirwynden wil, <ut> ss li. ii ar. xliiii wip ader mait⁷.

Claget man em nach der hant, er mus burgen setczin vor eyn halb wergelt, vnde ist darumme, das in vnserm rechte solliche sache gesaczt ist, ut ff. de exhibicione et <custodiaⁱ> reorum l. si quis¹³. Vnde dis ist darumme, das dy sache vornacht ist; anders sal man nicht zcu borge thun, <ut> C. de exhibendis et introducendis reis l. nullus¹⁴, <et> ff. de custodia reorum l. si quis reum¹⁵. Hat er abir keinen burgin, so sal en die vronegewalt behalden, <ut> ss li. i ar. lvi wo der man recht¹⁶ ver. wer do kein burge¹⁷. Jr sollet wissin: Wurde zo eyn man yn die vronegewalt geantwert, er were cleger ader antwerter, daz schat em zcu sinem rechten nicht, noch an sinen eren, <ut> C. quibus ex causis alicui infamia irrogatur l. infamie¹⁸. Wenne sollich beheltenisz ist irloubit von des rechtis volbort, <ut> C. de custodia reorum l. de hiis quos¹⁹, <et> C. de privatis carceribus l. i²⁰.

Pynliche borgeschaft lost man mit dem, das der beclaget waz, den er us borgete; vnde ist eyn wergelt, vnde das sien achtczen phunt. Vnde das ist dorumme gesaczt, das sich der burge der clage mit dem gelde weret, ut C. de fideiussoribus mandatoribus et solucionibus l. sanccimus²³.

Daz burcgliche burgeczog komit uffte hocher, vnde darumme kommit eyner lichtiglichir von dem burgeczoge, das yn pynlicher clage geschit, wenne in burglicher clage. Wie hoch eyner vor den and(er)n gelabit, das ist er gheme phlichtig zcu gelden. Hot er abir des burgen nicht, vnde ist in dem gerichte nicht besessin, so sal en behalden die vronegewalt, <ut> ss li. ii ar. v wer eygens alzo uil hot²⁴. Wen worumme wer sich by synem eigen vzborgen mag, der vorwist eyne sache baz, wen der do burgen setczte, ut ff. de regulis iuris l. plus caucionis²⁵. Vnde dis liet an deme richtere vnde an den schepphen; dy sollen wegen, ab eyner gesessin ist, das ist, ab er zo uil eygens hat, das vnuorschreben vnde vnuorphendet ist, das dis wergeldis wert ist, ader bessir denne die schult ist. Doch sunderlich, do dem vorderere an genuget, do sal dem richtere ouch an genugen. Wenne abir dem vorderer nicht genuget, als der antwerter sine besessinheit berurte, so muste der antwerter sine besessinheit bewisen. Alzo denne die bewisunge geschen ist, zcu dem selbien dinge sollen die schepphen irkennen, ab er besessin ist ader nicht. Jst er besessin, so darff er des /B 110^v burgen nicht. Jst er abir nicht besessin, so mus er burgen setczen. Hot er der burgen nicht, vnde ist die sache pynlich, so behelt en die vronegewalt, <ut> C. de custodia reorum l. si quis²⁶. Jst abir die sache vmme schult, die er bekennet, vnde hat er nicht burgen, vnde ist ouch nicht besessin, so antwert man en gheme by der hant.

<Weme^j> man icht schuldig ist, <der^k> mag sines geldis warten, ader vorsehen; wenne er mus clagen uff den schuldiger, <ut> jn autt. de fideiussoribus mandatoribus et solucionibus § quod autem colla. i²⁷. Wenne er denne so den schuldiger beclaget, vnde ghenner bekennet, vnde <hat^l> er denne varnde guth, do wist man den cleger zcu, alz zcu synem phande, <ut> ss li. i ar. lxx welch man²⁸, <et> jn autt. de fideiussoribus mandatoribus et solucionibus § quod autem colla. i²⁹.

Hat er aber wider eigen noch burgen, so antwert en der richter gheme by der hant vor sine schult. Alleine das wol uil recht wider disz recht^m sien, das man keinen durch schult wille in gefenckenisze brengen sal, <ut> C. de hiis qui bonis cedere possunt l. i³⁵, <et> jn autt. de fideiussoribus mandatoribus et solucionibus § quod autem colla. i³⁶.

Jr sollet abir disz vornemen, alz der text spricht von der schult, die er louckent; wenne wolde er douor sweren, so wurde er mit sinem eyde losz, alz verre alz er mit richtern vnde schepphen nicht obirwunden w(er)t. Vnde ouch hette der antwerter eigen, /B 111^r erbe, ader ander varnde habe, ader ioch sunderliche lehn, des solde er entwichen. Dorumme das er des nicht hot, dorumbe wil ghener sines geldis nicht entperen, dorumme vnderwindit er sich sien noch orteil vnde nach rechte. Were is abir sache, das der antwerter mit sinem eyde gelobete, ab em got ymmer icht bescherte obir sines libis notdorft, daz er deme vorderer gebenⁿ wolle, was er gehabin mochte, vnde vorborgete em daz, so bedarff man en em nicht mit der hant antwerten, <ut> Institu. de accionibus § cum eo quoque³⁷. Ouch antwert man eynen uffte yn die hant des clegers, das er lichte das sine vorgenglichen ader trogenlichin zcubracht hat, vnde der lichte nicht gelden wolde.

Vnde sich denne der antwerter williglichin in daz gefenckenisz antwert, dorumme sal er en gliche halden mit der spyse vnde mit erbeit synem gesinde. Wil er en abir weg furen vsz dem gerichte, das ist, vz des richters huze, so mus er burgen setczen sinem wibe vnde sinen kindern, das er en vnuorseret weder antwerten sal. Hette aber der sien gut troginlichen zcubrocht, zo mochte der vorderer den schuldiger spannen mit eynem vessere; das sal em nicht schaden an sinem libe, <ut> ff. qui in fraudem creditorum l. <si^o>³⁸. Vnde sollich gefenckenisz sal eyn ende nemen.

Daz er spricht: Vnde mit erbeit et cetera, do meint er, das er em darumme dynen sal. Vnde man sal sien dinst schatczin vnde an dem gelde abeslan. Darumme sal man keinen vmme gelt ewiglichen gevangen halden, <ut> C. qui bonis cedere possunt³⁹.

Jr sollit wissin: Wurde eyn man schuldig durch woltat willen, alz ab er ymande icht von gute gelabit hette, den mag man durch des gelobdes willen nicht hochir czihn, wen er vormag, <ut> ff. de donacionibus l. qui ex donacione⁴⁰, <et> ff. de regulis iuris l. donator^p 41.