Nu wil er hie angriffen das andere stucke des gewilkorten rechtis, vnde spricht: Sal eyn man sien eigen vorgeben, der sal komen vor die vir bencke et cetera, daz is vor eyn geheget ding. Jr^d sollet wissen: Eyn man mag drierley wise sines gutis enig^e werden¹.

Czum² ersten male, ab er is vorkouft, ut ff. de empcionibus l. quicumque³. Vff daz habit disse regele: Vorkewfft eyn man eyn ding vmme eyn genant gelt, vordert der kouffer daz ding, so w(er)t das eyn redelich kouff; vorder<t> er aber nicht, vnde lest dem vorkowffere das sine, er gewert en mit dem sinen, so verre ab er is nicht annamet, ut Institu. de empcione et vendicione § precium autem constitui oportet⁴.

Czum⁵ andern male so w(er)t eyn man des sinen losz, ab er vorseczte. Vnde dis czweiet sich nicht sere mit dem vorkouffen, wenne dis mag man weder losen, <des^f mag man des and(er)n^f> nicht gethun, ut C. de pingnoribus et creditoribus⁶.

Jr sollit wissin: Seczit eyn man eyn gut zcu phande, is sy varnde ader vnvarnde, wy lange is der yn gewere<n> hat, so kan er is doch do mete nicht zcu eigin irkrigen, sunder er mus gheme sien phant zcu losyn gebin, <ut> C. quibus modis pingnus tacite contrahitur /B 75^r per totum⁷.

Czum dritten male: Ader ab er is ufflest. Jr sollit wissin: Daz uffgebin mus geschen vor gerichte, vnde douon spricht er hie, vnde mus ouch geschen mit der erbin orloub, <ut> ss li. i ar. lii ane erbin orloub vnde ane geheget ding mag kein man sien eigen vorgebin⁸.

Contra. Wedir dis ist daz recht, das do steit ss li. i ar. xxxv ane des richters orloub mag eyn man sin eigen vorgeben⁹. Mag er denne daz vorgebin ane des richters orloub, was darff er denne des gehegeten dingis dorczu? Wenne die gabe ader <der^g> kouff <wandilt^h> nicht daz gut, sunder is wandilt die herschaft, ut Instituta de rerum divisione § per tradicionem¹⁰. Wenne hette ich eyne(m) eyn huz vorkouft, ich rumete is em, vnde er czoge doryn, daz husz blebe ymmer sien, vnde worczu durfte man is denne vor dem richtere ufflaszin ader vorreichen?

Solucio. Jr¹¹ sollit wissin virley nucz an eynes gutis vorreichunge. Czum ersten male so ist is eyne bestetigunge des kouffes, ut Instituta de rerum divisione § per tradicionem¹². Secundo. Ouch so ist die vorreichunge dorczu gut, ab daz gut czinshaftig were, daz is wissintlichen sy, daz man uff deme vorkouffere des czinses nicht dorffe warten. Vnde sunderlichen mehr: Were vorsessener czinsz uff dem gute, vnde hette denne disser das gut vorkouft mit allen rechten, alz er is hatte, vnde is ghenner also entphangen hatte vor gehegeter bang, er muste den czins selber legen, dem is vorreicht wart, ut C. de agricolis et censitis l. iii¹³. Tercio so ist is ouch dorczu gut: Wenne is der vorkouffir vorreicht, spreiche man daz gut dornach an, vnde sulde sich der kouffir an sinen geweren czihn, so mochte er der gewere des kouffers nicht geloucken, <ut> ss li. i ar. vii was der man¹⁴, et e. li. ar. xviii drierhande recht¹⁵ ver. das andere¹⁶, <et> Institu. de contrahenda empcione et vendicione <l.ⁱ> i¹⁷. /B 75^v Quarto so ist <is^j> ouch darczu gut, daz er des gutis eyne redeliche besiczunge habe, vnde <hilfft^k> em zcu siner gewere, ut Institu. de usucapcione et longi temporis prescripcione § iure civili¹⁸.

Nota practicam. Also hie gesprochin ist ,sal man sien eigin vorgeben‘, das ist vorreichen, vnde vornemet das wort ,sal‘, das ist zcu uornemen: Ab eyn man mit orteil vnde mit rechte dorczu getwungen werde, daz er is vorreichin muste, als ab is eyn man vorkouft hette, ader wie is in sollicher geschicht were, der kome vor eyn geheget ding mit sinem vorsprechen vnde mit yeme, der die gabe entphan sal, vnde sal em eynen vorsprechen mit dissin worten irkrigen: "Herre er richter, gunnet ir mir eyns mannes, der mir myn wort spreche, vnde bitte yn eynem rechten zcu irfaren, ab ir en mir icht zcu rechte geben sollit." So spreche der richter czu eynem schepphen: "N., ich frage uch darumme." Do spricht der schepphe: "Ir gebit en em billich", <ut> ss li. i ar. lx ane vorsprechen¹⁹ ver. der richter²⁰. So spricht der richter: "Also mir daz recht vnde orteil gefunden hat, so habit ir en billich." So bitte disser vnde spreche: "Ich bitte vmme eynen N.", vnde nenne en mit sinem namen. So spreche der richter: "N., sprich sien wort." Wenne em der vorspreche irloubt w(er)t, so kome der vorspreche an sien wort mit sollichin worten, ader den glich, vnde spreche: "Herre er richter, ghunnet ir mir, daz ich N. wort rede?" So spricht der richter: "Ich gan dirs wol." So spreche der vorspreche: "Herre er richter, ich dinge N. syn vnde mir myn recht uff alles, daz recht ist, ich benenne is, ader benenne is nicht, vnde bitte yn eynem rechten zcu irfaren, ab er is icht zcu rechte haben sal mit sinem vorsprechen, glichir wisz, ab ichz <benente^l> von worte zcu worte von rechtis wegen, ader waz darumme recht sy." So spricht der richter zcu eynem schepphen: "N., siet /B 76^r darumme gefraget." So spricht der schepphe: "Waz er dingit, daz^m behelt er billich." Alz er denne an sien wort komen ist, so gehe er mit dem gebere an sien gespreche mit des richters loube, ut ss li. i ar. lxii vmme blos geruchte²¹ ver. beide clegere vnde uff den et cetera²². Also er denne yn komit mit deme gebere, so spreche disser: "Seius hot eyn eygen vnde eyn erbe v(or)kouft, das er vmme seyne wol gewunnen guth gekoufft hette, daz wil er vorrechten Gayo, der is wedir en recht vnde redelich gekouft hot in sinen rechten, reynen vnde greniczin, als is en ankomen ist; vnde bitte yn eynem rechten orteil zcu irfaren, ab ir en in sollicher craft ader macht sehet, also alz er selber czu dinge, zcu ringe, czu kirchen, czu wegen vnde czu stegen ghen mag ane menliche hulffe, das er das selbie gut geben moge, wemeⁿ er wolle, daz is gheme hulfflich sy czu sinem rechte?" So sal man em vynden zcu rechte: "Bewist er sine macht vnde kraft, alzo recht ist, er genust is billich." So vrage der vorspreche: "Jch bitte yn eynem rechten zcu irfaren, wy er is bewisen solle?" So vint man em: "Nach siner gebort." So spricht er vort: "Nach demmale daz er eyn rittermeszig man ist, so bitte ich in eynem rechten ortil zcu irfaren, wie er sine macht bewisen solle?" So vint man em zcu rechte: "Ist er so mechtig, daz er von eynem steine ader stocke, der eyner elen hoch ist, uff eyn phert komen moge ane mannes hulffe, daz man em daz phert^o vnde den stegereiff halde, gegort sal er sien mit eynem swerte, vnde eynen schilt sal er haben an dem halse, so hat er sine krafft vnde macht bewisit, das er geben moge, weme er wolle, von rechtis wegen", ut ss li. i ar. lii ane erbin orloub²³ ver. alle varnde habe²⁴.

Nota. Bewist eyn burger solliche craft, das er gegort komet mit eynem swerte ane mannes hulffe, vnde /B 76^v sich <menlichen^p> bewist mit eynem geczogenem swerte, so daz er daz swert selber czihe vnde ynstosze, so teile<n> wir en mechtig siner wol gewonner habe, sie^q sy eigen ader erbe, ab sy vnuorgabit sy, <czu> geben, weme er wolle.

Nota. Bewist der gebuwer sine craft, daz er eynen vmmegang synem phluge geuolgen moge eyns morgens lang, so hat die gabe craft von rechtis wegen.

Nota. Ghet eyn wip zcu der kirchen ane menstliche hulffe ader wybliche, vnde sy von der kirchin gesessin sy czwenczig ruten, so mag sy daz ire vorgebin, daz ir nicht anirstorbin ist, daz sie sich nicht yn vormundeschaft gegeben hat, vnde sy selber czu dinge komet ane menschliche hulffe, vnde so lange do steit, bis daz man die gabe bestetiget, so ist sy mechtig, daz ire zcu uorgebin von rechtis wegen.

Jr sollit wissin: Wenne nu daz orteil ynkomet, daz er wol vorgebin moge, so spricht der vorspreche: "Herre, danckit gote vnde dem rechten, so gibt Seius Gayo hy uff eyn hus, das gelegen ist an der stat, als er is gehabt hat yn allen reinen vnde rechten, als er is gehabt hat vnde besessin, vnde bitte uch, herre er richter, das ir der gabe craft gebt, vnde bestetiget sy, als ir zcu rechte sollit." So spricht der richter: "Gib er eyn czeichen." So sal Seius eyn czeichen geben, eyne kogele ader eynen hut. So spricht der vorspreche vort: "Hie vorreicht Seius Gaio sinen hoff, ader daz huz, ader das eigen, ader daz erbe, das do gelegen ist an der stat, vnde nennet die stat eigintlichen yn allen reynen vnde rechten, als is an en komen ist; der selbien gabin, alzo mich orteil vnde recht gelart hat, vnde von mynes ammechtis wegen gebe ich craft vnde macht, vnde bite die selbie gabe uff zcu eynem mole, zcum and(er)n male, zcum dritten male, vnde zcum virden male obir recht, vnde /B 77^r bitte uch, N., in eynem rechten orteil czu irfaren, wer hie gheinwertig ist vnde swiget, ab er hirnoch billich swigen solle von rechtis wegen, ader waz recht darumme sy." So spricht der schepphe: "Sint demmale das die swigen, die do keinwertig sien, vnde daz orteil horen, vnde die gabe sehen, vnde nicht wedersprechin, vnde nu swigen, die swigen hirnoch billich."

Nota. <Den^r> die gabe schedelich geschit, die keinwertig sien vnde swigen, die swigen dornach billich, vnde ist den vnschedelichin, die vnkeinwertig sien, <ut> ss li. ii ar. vii welch man²⁵ <ver.^s> welche gabe²⁶.

Jr sollit wissin: Daz komit von des volkes saczunge. Wenne do Enoch, Cains son, die erste stat buwete²⁷, die noch Enoch genant ist, do wart^t sollich recht gesaczt: Wer dem and(er)n icht ufflassen wolde, der muste is thun vor dem hern; vnde do brochte der, deme man das gut uff gab, eynen phening zcu warczeichen, das is ghenes willen waz, der is vor hatte, ut Institu. de iure naturali gencium et civili § ius autem gencium²⁸, <et> ff. de iure naturali l. ex hoc jure²⁹. Vnde ist ouch komen vorth an dy Romere nach wich/B 77^vbilde rechte, vnde ist den von Meideborg bestetiget.