[18 § 1] Als wir begunst habin von des richters errunge zcu seczen, so sollen wir en wenig vorbaz mehr von dem richtere sprechen, vnde von der wise, wy sich eyn richter halden sal yn sinem gerichte. Wenne worumme is heist kein man eyn richter, wenne alleine in gehegeter bang. Wenne er aber sien gerichte vffgibt, vnde vz der gehegeter bang komet, so ist er als eyn ander slecht man; denne daz <er^c> den namen hat, daz er eyn richter genant ist, der ist em von des ammechtis wegin gegeben; wenne eyn iczlich ammecht, daz zcu dem gemeynen nucze gehorit, komet von dem Romisschin riche. Vnde eyn richter hat eigintlichen dry namen in dem Latin. Jn den drierley namen sien drierley synne.

[18 § 2] Weg(er)t er abir daz zcu thune, so besecze is der cleger, alz vor gesprochen ist. Das thu der cleg(er) zcum and(er)n dinge abir also, vnde besecze is, alzo vor gesprochin ist; vnde zcum dritten dinge^q kome der cleg(er) vor den burcgrauen, vnde bestelle sine clage, also vor gesprochen ist. Vnde wenne ma<n> em zcu der antwert gebewt, vmme daz daz er nicht zcu gerichte stehn wolle, noch ouch rechtis phlegen; vnde buͤt sich den(ne) der voit nicht zcu der antwert, vnde wil ouch nicht zcu gerichte stehn, <so^r> taget man em zcu deme and(er)n dinge; komet er denne nicht, so taget man em zcum dritten dinge. Vnde komet er dennoch nicht, so teilt man em helffrede zcum nehisten dinge. Brenget er der nicht, so spreche der cleg(er) zcu dem burcgrauen: "Herre er richter, nach dem male daz ich myne clage vor uch vnde vor uw(er)n gnaden also vor eynem rechten vnde gnedigen richtere /B 71^v geclaget habe obir den N. voit, der eyn voit ist, vnde eyn recht richter sien solde, vnde nicht gewest ist, als er mir rechtis geweg(er)t hot, des ich mich czihe an die schepphen vnde an den vroneboten an des richters stat, vnde er mir nach deme rechten nicht gestanden hot zcu myner clage, eyn ding, das andere, vnde daz dritte, vnde zcu der helffrede nicht gestandin hat, noch ouch noch gesteht, bitte ich in eynem rechten orteil czu irfaren, waz er nu kein mir vorfallen sy?" So vint man em zcu rechte: "Des vngerichtis." So spricht der burcgraue: "Nach demmale daz er dem cleg(er)e eyn vngerichte entstanden ist, vrage ich uch, N., waz er nu kegin mir, vnde kegin dem gotishuse, vnde kegen mynen herren, dem koninge, vorfallen sy?" So vint man: Alzo vfte, alz er nicht gestanden ist, alz manich gewette ist er dem burcgrauen vorfallen, vnde iczlich gewette mit czen phundin zcu bessern; vnde vmme daz vngerichte hat er daz gerichte vnde die voitie kegen dem hern vorloren, vnde kegen dem koninge den ban^s.