[13 § 1] Nv vornemet, wy en der koning den phalcz machte. Er nam die selbien vier manne von Schartaw, vnde thumherren, die ammecht von dem thume hatten; der thumprobist waz der eyne, der techant der andere, der viceprobist der dritte, der keller der virde. Dorczu nam er vir angeborne dinstmanne des gotishuzes czu Meideburg, den marschalk, den trugses, den schencken vnde den kemerer. Dorczu nam er eilff schepphen von der stat, vnde der schultheisse waz der czwelfte. Dorczu nam er dy /B 51^v vier leyenfursten, die dy ersten an des richz kor sien, den marcgrauen von Brandenburg, den herczogen von Sachzin, den phalczgreuen vom Ryne, den obirsten voit des gotishuzes zcu Meideborg. Do nam der koning die achtvndeczwenczig manne, die ich habe genant, vnde saczte dy oben^b vff den stul des phalczes, vnde gab en dy gewalt von sinent halben, waz orteil man czu Meideburg nicht vinden kunden, vnde ouch gestraft wurde, daz solde man vor dem phalcze holen, vnde waz orteil man gebe recht vnde redelich, daz solde zcu wichbilde recht sien in dem lande czu Sachzen.

[13 § 2] Zo denne daz orteil gegebin wirt, alzo vor gesprochen ist, zo sal man en geben zcu kuntschaft den virvndeczwenczig mannen ir iczlichem eynen gulden schilling, der sal iczlichir schilling czwelff schillinge wert sien sollichir pheninge, alzo do genge vnde gebe sien. So gibt man den virvndeczwenczig vier guldene marg, der sal iczliche marg czwelff marcke wert sien. Daz gibt man den /B 52^r achtvndeczwenczig mannen; vnde dem daz orteil gefunden w(er)t zcu fromen, sine busze; vnde ghener sal die koste gelden, dem bruch wirt an dem orteile.

[13 § 3] W(er)t ab(ir) dem bruch, der daz orteil gestraft hot, so gibt er mehr denne ghener, deme daz orteil gefunden w(er)t czu fromen. Nu horet, wy uil er mehr gibt. Den schepphen syne^c busze, die daz orteil funden hot^d, vnde^e dem richtere eyn gewette, ab man daz orteil schulde ehr der uolge; gehit abir dy uolge dornach, zo gibt man iczlichem schepphen sine buze, vnde deme, der daz orteil geuolget hot, vnde dem richtere so manich gewette.

[13 § 4] Were is abir zcu Halle geschulden, vnde czihn sich des ghein Meideborg, vnde man daz orteil ouch do straffit, zo gibt man do busze beyde zcu Meideburg vnde czu Halle. Vnde daz machte koning Otto alzo durch daz, daz wichbilde bestunde, alz is von alder czit gestanden hat, vnde machte daz herczug/B 52^v<thum> obir Elbe^f.