[12 § 1] Nv wil er hir sine rede volfuren, vnde daz gestrafte orteil, vnde wil domete geben zcu uornemen, daz in allen landen die eldiste stat des richz eyn houpt solle sien des rechten, alz er hir vns zcu uornemen gibt von Schartaw, vnde spricht: Wurde zcu Meideborg orteil gestraft. Vnde denne Meideburg die eldiste stat ist vnder den steten, die in dem lande sien, alzo vor gesprochin ist, vnde den hochsten stul hat zcu wichbilde rechte, vnde man sich denne mit eynem gesprochin orteil czihn sal an eynen hochirn richter, so muste man sich do mete czhin an den koning, ut C. de appellacionibus l. <imperatores^b>¹. Vnde denne den Sachzin zcu eynem grossin forteil vnde zcu eyner sundirlichen gnaden gegebin ist, daz sy nicht /B 51^r ehr zcu houe czihn solden vmme eyn gestraft orteil, der koning queme denne uff Sechsissche art, <ut> ss li. ii ar. xii wer dem and(er)n² ver.^c wen sy den koning erst irfaren³, vnde darumme daz leuten ir recht nicht vorczogin wurde, [12 § 2] darumme machte der keiser Otte den phalcz uff dem ende des thumes. [12 § 1] Vnde dorczu solde man nemen die vir eldiste man zcu Schartaw, dorumme das is das eldiste ist; wen der keiser Otto machte do daz herczogthum, vnde gab dorczu das land Aschcanien; vnde das husz Loburg wart gebuwet zcu dem herczogethum; wen vor waz is eyn koningrich. Do sie abir mit dem heiligen cristen glouben befangen wurden, do wart en von den Romern der name gewandilt, vnde wart eyn herczogthum genant, vnde daz selbie herczugthum waz Schartaw genant, vnde ist daz eldiste, alzo vor gesprochen ist.